Sunday, December 15, 2013

!! أسلمتُ بقلبى

أحلى حاجه فى الدنيا لما تعرف ربنا بقلبك 

اللى خلّى الموضوع ده يفرق معايا من بعد الثوره ومن تصرفات_من يطلقون على أنفسهم_ ((إسلاميين)) واللى موّعوا نفسى من قذراة تصرفاتهم وتدليسهم وخيانتهم وتعاليهم على الناس وكإن ربنا وكّل ليهم محاسبة الناس وانهم فوقهم ,, ده غير التصرفات اللى بترفضها أى قيم ومبادئ إنسانيه وفيها ما فيها من العنصريه .... حتى الشيخ الشعراوى اللى اتربيت على تفاسيره وإنه ربنا عز الإسلام بواحد زيّه ألاقيه شمات بيشمت فى بلده فى الهزيمه علشان النظام الحكام مش على كيفه 

اللى حصل ده هز جوايا حاجات كتير من أهمّها 

إن مش كل المشايخ اللى معروف عنهم التقوى أتقياء بالعكس أغلبهم مصلحجيه وأفاقين

إنه وارد جداً أى حديث منقول عن الرسول ((صلى الله عليه وسلم)) يكون حصل فيه تحريف على إيد واحد من اللى بينقلوهم وده يخلينا عمرنا كله عايشين على حاجات غير منطقيه ناقلها واحد ((فزلوك)) وحرّف فيها لما شبع وكإن ربنا وكله بهداية الناس

إنت مطالب ألا تتناقش تنفذ الحديث اللى مفسره ((علان)) بدون ما تنطق لانه حديث صحيح !! إيش ضمنى إنه صحيح يعنى أفهم ,, ده غير إن ديننا لو كان اتعامل من الأول بمبدأ نفذ بدون ما تفكر مكانش حد أسلم


وبالتالى ومع الأسف الشديد : مفيش أكيد فى الدين غير كتاب ربنا اللى تعهد بحفظه وصيانته واللى مفيش فيه أى حاجات تخالف المنطق ولا العقل بالعكس ,, كله موعظه وخير وتسامح وطبطبات حنينه واستخدم الترغيب فى الجنه قبل التخويف من النار واللى لما الواحد بيتوجع من الدنيا بيجرى عليه علشان يطبط عليه ويحس بربنا وبحب ورحمة ربنا بقلبه من كلامه 

الحمد لله على إن ربنا هدانى لمعرفته بقلبى وإلا كانت تبقى كارثه والفضل يرجع لبتوع ((مصر إسلاميه)) ،، العباره اللى أصبحت مُبتذله من كتر ترديدها على لسان من هم ليسوا أهلاً للنطق بها واللى وصلوا الواحد لإنه مش عايز حكم إسلامى على يد من هم على شاكلتكم 

الإسلام ده يعنى كل حاجه حلوه فى الدنيا ((التسامح ,, الإنسانيه ,, حب الغير ,, الإيثار ,, الأخلاق الحسنه ,, عدم الخوض فى الأعراض ,, معاملة من هو على غير دينى بأحسن ما يكون لانى بكده بدى صوره عن دينى ,, حب ربنا وفعل الخير ,, انعكاس دينى على تصرفاتى)) .. مش أعمل كل ما عكس ذلك وبعدين أقول ((إسلاميه)) ؟! فالحين بس نطلق مسميات ونلزق فيها إسلاميه علشان نبين إننا نعرف ربنا أكتر من غيرنا وخلاص ,, إسلامنا برئ من أمثالكم !!

الحمدُ لله الذى هدانا لهذا وماكنا لنهتدي لولا أن هدانا الله

Friday, December 13, 2013

!! أنا بائسه

و كأنّ هذه الدنيا لا يكفيها ما فعلت بى وكيف سلبت روحى منى فتأتى فى أحد أجمل أيامى لتضرب بسعادتى عرض الحائط وتطيح بها مرتدةً فى وجهى مرةً ثانيه ,, لتجعلنى أفيق على واقع مؤلم كم هربت منه وتجاهلته ((متعمدةً)) .. فتخبرنى بنبرةٍ غاية فى القسوة مصدرةُ قهقهاتٍ عاليةٍ مدوية :

كم أنتِ بائسة ومثيرة للشفقة 

جاء كلامها مثل الصفعة على وجهى ,, صفعة قاسية لطالما تعمّدتُ الهروب منها ,, جاءت قوية للحد الذى لم أستطع تجاهلها أو تمالك نفسى فانهرت 

نعم لقد انهرتُ تماماً ,, انهارت كل قواى .. أصبحتُ هشه كالريشةِ فى مهبّ الريح كمثلِ ذرة رمالٍ تحملها العاصفه من هنا لهناك دون أدنى تحكّم منها 

نعم أنتِ محقة ,, أنا بائسة .. بائسة لانى لا أفكر فى نفسى إلا قليلاً !! لا أنا لا أفكر فى نفسى أبداً .. أنا أفكر فى الجميع إلا نفسى

أفكر فى من حولى ,, هل ما سأفعله سيغضب فلان ؟! لا لن أستطيع أنا أقول ذلك لهذا لان ذلك سيجرح مشاعره !! أوليست مشاعرى تستحق الاحترام قليلاً ,, فقط قليلاً لم أطلب الكثير 

أوَلا يكفى البائس بؤسه وادعاءه أنه سعيد حتى ترسل له الدنيا من يُحطّمه ؟! أولا يكفيكى ما فعلتِ بي ؟؟

سلبتنى الشئ الوحيد الذى بحقّ كنت أحتاجه .. سرقتى روحى على حين غفلةٍ منّى وبينما أنزف وأنزف تعمّدتى إهانتى وإذلالى ,, ألا يكفيكى ؟؟!! كم عليّ من الثمنِ أن أدفع حتى تغُضى الطرف عنى وتتركينى فى سلام ؟

حقاً ,, أنا لا أريد سوى العيش فى سلام !! لماذا تُلقى بنيرانك فى وجه من لا يحتمل ؟؟ لماذا لا يوجد لديكِ ذرة من رحمة ؟

هل لأنّ القسوةَ من طباعك أم أنّنى أستحقُّ كل هذه القسوه ؟! نعم قد أكون أستحقّ كل هذا وربما تخليص ذنبٍ فعلته ذات يوم غير متعمدةٍ وربما كنت متعمّده 

بدأتُ يومى بسعادةٍ غامرةٍ وأجواءٍ احتفالية جميله وها أنا أفيقُ فى نهاية اليوم على واقعٍ أليم :

أنــــا بائسه 

شكراً لتذكيرى بذلك كلّما حاولت أن أتخطاه أو أتجاهل وجوده ,, شكراً 

Wednesday, October 23, 2013

!!!! أنانيه ؟! ربما

شعرَت بهذا الحنين الليلى الغامض الذى يكتنف (المختلفين) و يزاحمهم أوقاتهم وربما سعادتهم أحياناً 

     قد يكون تعبير (المختلفين) غريباً أو غير مألوفاً وليس بالطبع تمييزاً عن باقى البشر ولكنها و لسببٍ ما حقاً تختلف عن الأغلبيه ,, فهم يحبون قضاء أمسياتهم مع غيرهم يسهرون يضحكون يشاهدون الأفلام أو حتى يستمعون للموسيقى

 أما هى فلا ,, فمساؤها عباره عن كتاب تقرأه (وحدها) أو قمر تطالعه (وحدها) أو حتى تجلس فى غرفتها تفكر(وحدها) أيضاً 

 ربما يبدو لغيرها حزناً أو كئابةً ولكنه لس كذلك بل هو قمة التعايش مع الذات بعيداً عن صراعات الحياه فى النهار وحتى قدوم هذه الساعات الخاصه اللى تعد هبه من الله تعالى لها 

 هذه الليله وحين باغتها الحنين أمسكت بهاتفها لترى من تُحادثه لتحكى له فيشاركها ما تشعر به ,, آه هذه صديقتى والوقت مُتأخر فربما زوجها نائم الآن أو تُعِدُّ لهُ العشاء لا يجوز الاتصال فى هذا الوقت حسناً ,,, تبحث مره أخرى فى الأسماء اه هذه ايضاً صديقتى سأتصل بها لمحادثتها فأنا حقاً محتاجه لمن يسمع هذا (الهراء) بداخلى 

 آها مشغول ومشغول ومشغول آه تذكرت ربما هى على الهاتف تتحدث مع خطيبها فهذا وقت العشاق كالعاده .. اللهم أسعد قلبها يــــا رب 

 وهذه صديقة الطفوله سأتحدث معها ,, آه ولكنها بصدد التحضير لزفافها ولا يوجد داعى لنقل طاقة سلبيه أو إرهاق قلبها بما لا يتحمله وهى سعيده وبحاجه لمن يشاركها فرحتها لا أن يحملها عبء سماع (هراء) غيرها من المشاعر الغير مفهومه

 آه !! إنتهت قائمة الأصدقاء على الهاتف ولم أجد من أحادثه

 تفكر قليلاً وبداخلها تقول : وماذا بعد ؟؟!! هل أنا أمسيتُ حقاً بهذه الوحده ؟! أم أن انشغالهن عنى هو ما اشعرنى بذلك ؟! أوليس من حق الصديق على الصديق أن يجده وقت أن يحتاج إليه ؟! أم أنها الحياة التى تأخدهن بعيداً لأعتمد على نفسى ونفسى فقط ؟

 سمعتُ ذات مره معلمة لى تقول :(( صداقة البنات غير دائمه فهى لن تستطيع نجدتك ليلاً إن احتجتى اليها لانها ليست ملك نفسها)) !!! وقتها لم يعجبنى كلامها ونعتها بالـ (معقده) أما الآن فيباغتنى كلامها ببعض المنطق !! أم أننى أصبحتُ معقدة مثلها ؟؟

ثم تحركُ رأسها يميناً ويساراً وهى تقول : ماذا لو تحدثت مع أى شخص فيما اشعر به الآن فماذا سيكونُ رده ؟! بالطبع سيقول : (أنانيه) وربما يقول : ( إنها غيرةُ الفتيات من رفيقاتها اللاتى ارتبطن قبلها ) !! ولكن يمكننى تفهم نفسية من يقول هذا أيضاً ولن ألومه على نظرته ضيقة الأفق 

ولكن يبقى السؤال الذى يتكرر عليّ ولا أجد لهُ إجابةً حتى الآن فتمر الأيام بل و الشهور دون سؤالكم عن حالة قلبى وإعطائى نصف ساعه فقط من الاهتمام بى_فقط_دون تبريرات للبعد أو إلقاء اللوم علي فى عدم السؤال !!! وهل السؤال عن الحال كتأدية واجب هو ما يُنتظر من الأصدقاء ؟؟!! السؤال عن الحال هو حال زملاء العمل وحتى الأغراب لا الأصدقاء (على حد علمى) ,,, كيف يمكننى بعد ذلك إعتباركن مختلفات عن الأخريات وأن بوسعى أن أجدكن وقت أن احتاجكن ؟؟

 أنتن صاحبات فضل عليَّ فى حياتى كلها ,, فكل واحدةٍ منكن قدمت لى ما لم يقدم لبشر من المساعده و التحمل و المسانده و الطبطبه وحتى تغيير الشخصيه للأفضل ساهتمن فيه بنجاح ودون مقابل وهى أشياء لا تنتسى ولكن ماذا عن القادم ؟! هل اخذت نصيبى منكن كاملاً فلم يتبقى لى شئ ؟ 

 قد ترونها أنانية منى (أعذركن) وقد ترونها عدم تقدير لانشغالكن (أعذركن) أيضاً ولكن إحداكن قالت لى ذات مره ((باستطاعة أى شخص أن يجد وقت لمن يهمه أمره)) ومن سخرية القدر أنها فعلت ما ضايقها و قالت هذه المقوله بسببه

 تساؤلات ليس لها نهايه ولن يجيبنى عنها سوى الأيام _وقد لا تفعل_ كل ما أعرفه الآن أن انشغالى عنكن والذى قد يحدث لأى سبب كان_لايُشترط الارتباط_لن يصبح مقروناً بتعذيب ضميرى أو بإحساسى بتقصير ناحيتكن _مع الأسف

Saturday, October 12, 2013

!! جاوبينى يابلدى

: أنا عايزه أسألِك شوية أسئله ونفسى تجاوبينى عليهم 

هو أنا هفضل أحبِّك كده وانتى قاسيه كده 

 طب إنتى اللى وحشه ولا احنا اللى وحشين 
طب انتى بتقتلينا ولا احنا اللى مش عارفين قيمتك وبنهدِّك وندمَّرك 

لو القتل و الدم كان من طرف واحد كنت قلت إن همَّ الأشرار وإحنا الطيبين

 لكن لأ !! الأدوار بتتبدل والشرير بيتحط مكان الطيب و الطيب بيتحول شرير عشان يبرر لنفسه إنتقامه من الشرير (سابقاً) ويقبل على نفسه اللى رفضه منه

الأفلام زمان كانت بتقول : إن الخير بينتصر فى النهايه

 طب هى فين النهايه ؟! وفين الخير ومين هينتصر وكله بقى شرير 

طب أنا مش مرتاحه ليه ؟! مابين دول ودول مش راضيه ومرتاحه ليه

 إيه المطلوب منى علشان أوصل للرضا من جوايا عن اللى حاصل ده 

 ليه رغم الوجع والدم اللى ريحته بقت فى الهوا اللى بنتنفسه بحبِّك 

طب الحُب ده هيستمر ولا هييجى يوم ويخلص 

 إيه اللى فيكى بيخلينى ماسكه بإيدى وسنانى .. ولا قادره أكبَّر دماغى ولا عارفه أرتاح 

ولا إنتى هتجاوبى ولا حد هيجاوب ,, كل اللى متأكده منه إنه لو جت رصاصه طايشه موتتنى وأنا فى شوارعِك ,, هلاقى اللى يقول دى كانت (إخوان) إرهابيه تستاهل أكتر من كده .. !! بالذات إن شكلى ولبسى شبههم 

بس وقتها إبقى افتكرى إنى كنت بحبِّك أكتر من روحى ,, وإنى حاولت متخلاش عنِّك بس إنتى اللى رفضتينى !!!!!!!

Tuesday, October 8, 2013

!! وما العِشقُ إلا جنونٌ فى جنون

يقولون أنَّ ليل الشتاءِ لا يحلو سوى للعاشقين ليقضونهُ سوياً يتهامسون ,, يتحاورون ,, يتجادلون وما خفِي عن الأعيُنِ هم بهِ أعلمون !!

أولَم يخبركم غيرى عن ليلِ عاشقِ هجرهُ حبيبهُ كيف يكون ؟!

هذا الحنين لدفء عينينِِ غابت ولازالت حاضره ,, هذا الاشتياق الجارف الأقوى من عواصف الخريفِ بأتربتها ,, هذه النارُ المتقده التى لا تُطفئُها محيطاتُ الكونِ أجمع !!

قد يكونُ وقعُ ذلك حزيناً ولكن _ وعلى عكس المتوقع _ فهذا هو قمةُ السعاده و الدفء !! 
نعم ,, فبعضُ الناس لا يكتفى فى عشقِهِ سوى برؤية الحبيب و بوصاله طوال الوقت أما البعضُ الآخر فلا !!

فقمةُ السعادة تكمنُ أحياناً فى هذا الحنين وذلك الاشتياق وهذه النار التى لا ولن تنطفئ :) :) 

نعم ,, هو دربٌ من الجنون !! وما العشقُ إلا جنونٌ فى جنون !! :)))

Wednesday, October 2, 2013

!! بل هوَ قِمَّةُ العِشق

أعدَّت فنجالاً من القهوة التى تعشقُ رائحتها التى تغذى بداخلها الحنين للكتابه وفتحت باب غرفتها ودخلتها وأغلقت عليها الباب وكأنها تفتح قوقعتها التى لم تشعر يوماً بوحدة بداخلها رغم كونها وحدها حقاً بداخلها !! أمسكت بهاتفها فتحت الـ Notes وبدأت فى الكتابه فقالت : 

فى العاده يتمنى العاشق أن يرى حبيبه الذى هجره ولو لمرةٍ واحدةٍ أو كما يقول الكثيرين "مره واحده بس وأموت بعدها" !!

بعكسى تماماً !!

لقد مرت ليالٍ طوال تمنيتُ فيها بل ودعوتُ ربى ألا أراك ولو مصادفةً ,, قد يظنه البعضُ كرهاً وربما نسياناً ولكنهُ ليس كذلك !!

بل هو قمةُ العشقِ !! 

معنى أن أراكَ هو أن تنهار قوايَ التى استغرقتُ شهوراً لتجميعها ,, أن تنظُر عيناى لعينيكَ دونَ أن أعلم ماذا أُبدى فيهما .. هل أُبدى عشقاً أم نسياناً أم عتاباً أم لوماً أم شوقاً ,, أنا فعلاً أخشى تلاقى عينانا ثانيةً !!

قد تُفسِّرهُ غروراً وقد لا تهتمُّ حتى بتفسيره و فى الحالتين لا يُعنينى فقد تعوًّدتُ أن أعيش عشقى لكَ وحدى بدونك ,,, ولم يُثنينى هذا عن عِشقك بل على العكس يزدادُ يوماً بعد يوم !!

وعلى الرغم من أن ملامحك الهادئة الحنون تجتاح ذاكرتى رغماً عنى أو لأكُن صادقةً بملء إرادتى إلا أننى أصبحتُ أغضُّ الطرفَ عن أى احتمالٍ ضعيفِ لرؤيتك !!

يا إلهى يا لها من حالة من العبث و الفوضى تجتاحُنى ,, حاله من العِشقِ لم أقرأُ عنها يوماً ولم يستطع أحدٌ تقبُّلها ولا استيعابها ولكن على غير المتوقع فهذا أيضاً لا يُعنينى ,,, ما يُعنينى حقاً هو الراحه و الاكتفاء وهذا ما أجدهُ فى عشقك وفى ملامحك المحفوره بداخلى والتى تسكنُ أعماقى بل وتجرى فى شرايينى مع دمى والتى تغذى روحى حتى على الرغم من عدم رؤيتك !!

أغلقت هاتفها ووضعته بجانبها واحتضنت وسادتها وقالت لهُ ((تُصبح على خيرٍ)) فى نفسها ونامت سعيدة مبتسمه مثل كل يومٍ منذ فِراقهُما متمنيةً أن تراهُ فى منامها ,, ففى الأحلام لا يوجد قيد ولا حسابات دنياويه معقدة تجعلنا نتحكم فى ما وهبنا الله من نعمةُ ألا وهى "العشق" !! ❤️❤️

Monday, September 23, 2013

!!! يا هاجِـر قلبى ، لـو تِسمح

يا هاجِـر قلبى لو تِسمح ،، تغيب عن قلبى انا لأه 
هجرت وقلت لو تنسى ،، صرخ قلبى وقال لأه
صحيح الهجر بمزاجك ،، لكن قلبى رفض لأه 
مـَلَو قلبى نوى ينسى ،، مكانشى دق ولا دقه 

Thursday, September 19, 2013

!! الحُب والبامبرز

وبعد ما تغنَّى كبار الشعراء بالحُب واتكتبت أروع القصائد عن اللهفه ، والشوق ، والحيره ، وسهر الليالى ، والهجر ، والخصام ، والوصال ، وصفات الحبيب اللى بتبرجل اللى بيحبه بكل تفاصيلها ،، وأم كلثوم اللى غنت أروع قصائد وكلمات عن كل مشاعر الحب باختلافها !!

تيجى تلاقى عيل ببامبرز لسه فى خامسه ابتدائى بيطلَّع عين أمه عشان يرضى يستحمى باعت لبيدجات الكراشز ويقولك : "أدمن أنا بحب زميلتى فى الدرس ومش عارف أعترفلها ازاى لأنها بتحب ممدوح وممدوح مش حاسس بيها لانه بيحب رشا" o.O 

وهنا يخطر على بالى سؤال افتراضى : طب انت خلصت الواجب ولا لسه ؟! وشربت اللبن ودعكت سنانك ولا نسيت ؟؟ 

كلمة "الحب" من كُتر ما اتهرست فى علاقات تافهه وخايبه اتشوهت وبقى مجرد ذكرها غير مؤثر على الإطلاق ،، يعنى دلوقتى لو حد جه فضفضلك وقالك إنه بيحب ، هتبقى قاعد مستنى تشوف الحب ده حقيقى ولافاكس ولا اشتغاله !! :( :(

حُب على مواقع داخلين يدوروا ع الجواز !!!!!! ،، وحب ع الفيس ،، وحب فى الدرس ،، وحب م البلكونه ،، وحب فى السيكشن ،، وحب بس لو يغير من نفسه شويه يبقى أحلى !!!!! (على أساس إنه فستان هيتقيف على مقاسك مثلا) ؟؟ 

ويبقى ليا أنا واللى زيِّى اللى بيقدسوا الحُب وبيشوفوه بنظره عظييييييمه جداً واللى كانت كلمة "حب" لوحدها بتعبر عن كللللللللل اللى بيتضمنه الحُب من غير شرح وتفصيص ،، يدورولهم على مصطلح تانى يعبر عن قصدهم وفهمهم للحُب .. بدل كلمة الحُب اللى بقت من كتر تكرارها كلمة مبتذله وماسخه ملهاش معنى !!!

Wednesday, September 18, 2013

!! أنا و القمر

وببقى ماشيه مخنوقه وشايله الهم و هلكانه من التعب :

والاقى ده طالعلى فى السما هاله من نور بيكلمنى وبيقولى بصى ربنا خلقنى جميل إزاى ؟! شفتى بقى انا جيت دلوقتى عشان مسيبكيش زعلانه كده ,, ابتسمى بقى يللا وافرحى ^_^ ^_^

بصه واحده للقمر بتنسينى كل زعلى فى ثانيه وتلاقينى ابتسمت وقعدت احكيله ايه اللى كان مضايقنى و كإنى بسمعه بيقولى طب معلش مفيش حاجة سهله بس الصعب آخره حلو وبعدين يتولى مهمة فرفشتى بقى وهو ماشى جنبى طول منا ماشيه ^_^ ^_^

بينى وبين #القمر قصة عشق محدش يقدر يستوعبها أوى ,, بس كل اللى هقدر أقوله لربنا إنت إزاى يا حبيبى بقدرتك خلقتلنا كل حاجة جميله كده و كل حاجه فيها صفه أو أكتر من صفاتك عشان نشوفها ونفرح بيها و تطمننا إنك معانا على طووووووووول <3 <3

ومن حنيتك عليا تبعتلى الحاجه دى وأنا زعلانه ومخنوقه ^_^ ^_^

بحبك ياربنا يا حبيييييييييبى <3 <3 <3

Wednesday, September 4, 2013

!! الصداقه من منظورى الخاص

مفهوم الصداقه بيختلف من شخص للتانى : 

فيه اللى الصداقه بالنسباله وهم وحاجة مش حقيقيه لإنه اتخدع من أصدقاء كانوا مهمين فى حياته جداً وده اللى سببله الإحساس ده !! 

وفيه اللى الصداقه بالنسباله خروجات وفسح وهزار وتهييس طول الوقت وحد بخرج معاه من مود الحياة الجَد طول الوقت !! 

وفيه اللى الصداقه بالنسباله كتف حنين يعيط عليه حتى لو الصداقه دى ع النت وعمر الحياه ماجمعتهم فى يوم وجهاً لوجه !!

الصداقه بالنسبالى أنا : حاجة كانت مهمه جداً فى حياتى ف وقت من الأوقات واللى مؤخراً اكتشفت إن مشاغل الحياه ممكن تاخد منى صحابى وقت ما احتاجلهم رغم إنى دايماً بكون جنب أى حد فيهم محتاجلى حتى لو الموضوع تافه وحتى لو خد من وقتى أنا ساعاااااات بتفاهته دى ،، مش مهم لكن المهم إنه يخلص كلام معايا مرتاح ومبسوط .. والأغرب إنى بعمل ده مع اللى مش صديق أوى كمان ،، معرفش وكإنه مع الوقت بيتحول لهدف من أهداف حياتى !!

شروط الصداقه بقى واللى حاططها قلبى (اللى أنا مليش سيطره عليه وماشيه بيه وعاجبنى حتى لو ده غلط) تعتبر شروط قاسيه شويتين !! لأ تلات شويات وده مش بيتناسب مع ظروف ولا تقبل حد !!

وعشان كده وصلت من جوايا لنتيجه غريبه (بردو قلبى اللى حطها) بدون تحكم منى ----> (((أنا وحيده))) ،، بس مش بالمعنى الحزين لوحيده بالعكس .. وحيده لان محدش فاهم فكرة الصداقه من منظورى الخاص .. وحيده لانى الوحيده اللى بتفهم طققان تفكيرى ومشاعرى أحياناً .. وحيده لانى الوحيده اللى متفرغه لنفسى على طول أطبطب عليها واحضنها وامسح دموعها بدون شروط ولا قيود ولا خوف من انها تحكم عليا !! :)))

الحمدُ للهِ الذى هدانا لهذا وماكُنا لنهتديَ لَولا أن هدانا الله :))

Thursday, August 29, 2013

وأخييييراً ، حلمتُ بك !! ♥♥

يــــــــــــــاه كم كنتُ أتمناها و كانت تعاندُنى أحلامى !! 

وعلى الرغم من احتلالِك الدائم لذاكرتى و ملامحك التى تسكن قلبى و تفاصيل حياتى والتى جميعها هى ملكٌ لك وحدك حتى دون وجودك الجسدى فيها ,, كانت أحلامى تعاندنى و تأبى أن تظهر لى فيها بهيئتك الكامله فتمتلئُ عيناى بنورك و تتغذى روحى على رؤيتك !!

وأخيراً أشرقت شمسُ أحلامى بِكَ معلنةً لى عن تحقق أمنيه تمنيتها لشهووور طوال !!

آآآآآآآآآآآهِ لو تعلم كم أنا سعيدةٌ الآن و كم أتمنى رؤيتِك فى أحلامى كل يومٍ ,, تقفُ أمامى بابتسامتك الصافيه الخاليه من صخب الحياه ,, بعينيك اللتان تحملانِ حنانَ الدنيا و ما عليها !! <3<3

لماذا تعاندُنى أحلامى هكذا ؟! لا أعرف و لن أُشغل تقكيريَ الآن !!

فأنا الآن أُحلِّقُ عالياً
أغمضُ عيناى كل دقيقه لعدة ثوان لأراك مره ثانيه و ثالثه ورابعه و مليون و لن أملَّ رؤيتك ما حييت ,, و هل يملُّ العاشق رؤية من يعشق ؟؟ :))

Wednesday, August 28, 2013

عقاب الحب

كـل حُـب و ليه عقابه , بس قبلها لازم تسأَل نفسَك سؤال محدش هيقدر يجاوب عليه غيرَك إنتَ و بس ;

( حُبَّك يستاهل إنَّك تتعاقب علشانه ولا لأ ) ؟؟!!! ;)♥♥♥

الابتلاء نعمه

أنا واحده ربنا ابتلاها علشان يعلمها الأدب , و لما اتعلمت و فهمت و رضيت فتح عليها من كرمه و فضله و رحمته بما لا يخطر على عقل بشر♥♥♥

وقتها بقى نشأت علاقة بينى وبين ♥ربنا♥ حبيبى حلوه كده صعب حد يتخيلها أوى يعنى , أى حاجة تقع فى ايدى محيرانى أعرضها عليه و اكلمه و اقوله انا شايفاها ازاى و هو بقى ( بفضله و رحمته و كرمه ) يورينى حاجات تقولى إنى صح أو إنى غلط ( _ )

الجميييييييل بقى إن ثقتى فيه عمرها ما خيبت ولا مره و بيطلع اللى دلنى عليه هو اللى فى مصلحتى و هو اللى صح و هو اللى يريح قلبى ♥♥♥

الحمد لله الذى بنعمته تتم الصالحات بحبك يا ♥ربنا♥ يا حبيبى


ثوار قال

الواحد ساكت وحاطط جزمه فى بؤه (وده صعب ع اللى زيى) :

و مش بيلطش فى بتوع مرسى إحتراماً لحزن فوق الـ 1000 عيله (مش أسره) محروق قلبها على ضناها و هى 70% منها و لا إخوان ولا زفت حتى عشان متبانش شماته والعياذ بالله !!

و مش بيلطش فى السيسى ولا بتوعه عشان موقفنا اللى زى الـطين قدام الدول كلها اللى حاشره مناخيرها حاشره سوداء على دماغ اللى خلفوهم و مينفعش تعض فى عسكرى واحد حتى دلوقتى لانك هتبقى خسيس و ضد جيشك (و ده حقيقى) عشان فى تحليلات بتقول كلام غير اللى الطرفين ظايطين فيه ولازم الواحد يشوف الأحداث جايبه إيه الأول عشان يتأكد من التحليلات دى صح ولا لأ !!

وتلاقى واحد (نطع) "ثورى سابقاً" خد 3 إبر بنج واحده فى ضميره عشان ينيمه وواحده فى قفاه عشان يتاكل عليه ميحسش و الثالثه خدها فى عقله عشان يتسحب زى الحمار وجاى يقولك (((إنت حيادى وطرى))) !!

يا شيخ اسفوخس على أبو دى أشكال زباله عاله ع الثوره و ع الثوار !!

الوقت اللى إحنا فيه ده مش وقت ناس بتفكر بعقلها زى حالاتى أنا واللى زيى , لأ ده وقت ناس ظياطه أنطاع زيك كده ,, لأ و مش ساكتين دول كمان بيتبلوا على غيرهم يعنى طلعت حمار وقلنا كل واحد حـر ترمى بلاك على اللى خلفونا ليه بقى ؟!

عزيزى الحمار : احتفظ بحموريتك لنفسك !!

سياسه وكده


فى كل شارع فى حى شعبى هتلاقى اتنين ستات شلأ صحاب قارفين كل اللى فى الشارع ،، دول بقى لما بيتخانقوا سوا يييييخخخخختتتتتى بيقطعوا بعض وفى الشارع بردو !!

طب والناس بتعمل إيه وقت خناقتهم سوا ؟!
اللى يحاول يسلك هيتفرم فا بيقعدوا يتفرجوا لحد ما يتعبوا من الخناق وبعدين يرجعوا يتصالحوا و يقرفوا فى السكان تانى !!

بـــــــــس خلاص

أنا تيته

بسرح بخيالى و أتخيل الواد حفيدى جاى و بيقولى إحكيلى يا (نانَّاه) عن الثوره اللى كانت على أيامك !! مش هيبقى قدامى غير حاجه من اتنين :

يا إما أقوله : عيب يا بابا متتكلمش فى الحاجات دى لما تكبر هتعرف !!
أو هقولـــه : إنت إبن مين يا واااااااااااد !! #زهايمر_وقتى

ملحوظه : الردود دى تجنباً لحالة التفافه المنيله اللى هلاقيها منه لو حكيتله و تجنباً للأسئله المحرجه من عينة ((إنتى بتهزرى صح؟؟!!))

نانَّاه دى يعنى تيته بس بلغة ولاد الناس

مجازفه

وتلاقى نفسك ما بين خيارين :

"إيمانك" و "عقلك" !!

فا تختار "إيمانك" ,, أصل فى حاجات كده تستحق المجازفه !!

أمومه

وقد وُلدت الأمومه بداخلى يوم أن أزهر حبك فى قلبى !! <3